علی پور: وزیراعلیٰ پنجاب مریم نواز شریف کی ہدایت پر سینئر وزیر مریم اورنگزیب رات گئے علی پور کے سیلاب متاثرہ علاقوں میں پہنچیں، جہاں انہوں نے متاثرین کے لیے جاری ریسکیو آپریشن کا جائزہ لیا۔
علی پور اور گردونواح میں شدید سیلابی ریلے نے تباہی مچا دی ہے جس کے نتیجے میں متعدد دیہات زیرِ آب آ گئے اور سینکڑوں افراد متاثرہ علاقوں میں محصور ہو گئے۔ انتظامیہ اور ریسکیو ٹیموں کی جانب سے متاثرین کے انخلا کے لیے بیڑوں اور کشتیوں کے ذریعے آپریشنز جاری ہیں۔
مریم اورنگزیب نے سیت پور اور لتی ماڑی کا ہنگامی دورہ کیا اور موقع پر موجود حکام کو فوری طور پر امدادی کارروائیاں تیز کرنے کی ہدایت کی۔ ان کے دورے کے دوران سیلاب زدگان کی نگرانی میں انخلا کا عمل جاری رہا جبکہ درجنوں خاندانوں کو محفوظ مقامات پر منتقل کیا گیا۔
پنجند کے مقام پر مریم اورنگزیب کو سیلابی صورتحال، متاثرہ علاقوں کی تفصیلات اور انخلا آپریشن پر جامع بریفنگ دی گئی۔ اس موقع پر وہ خود امدادی سامان، ٹینٹ، خوراک اور پینے کا صاف پانی لے کر سیت پور روانہ ہوئیں تاکہ متاثرہ خاندانوں تک فوری ریلیف پہنچایا جا سکے۔
میڈیا سے گفتگو کرتے ہوئے مریم اورنگزیب نے کہا کہ حکومتِ پنجاب کی سب سے پہلی ترجیح متاثرین کو محفوظ مقامات پر منتقل کرنا اور انہیں فوری ریلیف فراہم کرنا ہے۔ متاثرین کے لیے شیلٹر، ادویات اور راشن کی دستیابی یقینی بنائی جا رہی ہے جبکہ ضلعی انتظامیہ اور ریسکیو ٹیمیں دن رات سرگرم عمل ہیں۔
انہوں نے مزید کہا کہ وزیراعلیٰ پنجاب مریم نواز شریف خود علی پور میں جاری ریلیف سرگرمیوں کی براہِ راست نگرانی کر رہی ہیں اور حکومت کی پوری مشینری متاثرین کی مدد میں متحرک ہے۔
سینئر صوبائی وزیر نے واضح ہدایت دی کہ کوئی بھی متاثرہ خاندان امداد سے محروم نہ رہے اور ہر ممکن سہولت فوری طور پر مہیا کی جائے۔
