ابوظہبی / دبئی: متحدہ عرب امارات میں 54واں یومِ اتحاد (نیشنل ڈے) 2 دسمبر کو روایتی جوش و جذبے کے ساتھ منانے کے لیے بھرپور تیاریاں جاری ہیں۔ یہ دن ملک کی سات امارتوں کے اتحاد اور قیام کی یاد کو تازہ کرتا ہے۔
سرکاری اعلامیے کے مطابق 2 اور 3 دسمبر (منگل اور بدھ) کو سرکاری تعطیلات ہوں گی۔ ویک اینڈ کے ساتھ مل کر عوام کو 4 دن کا طویل ویک اینڈ ملنے کا قوی امکان ہے، جبکہ ملکی قوانین کے تحت یہ وقفہ 5 روزہ تعطیلات تک بڑھ سکتا ہے۔
اس سال کے جشن کا آغاز ایک عظیم الشان تقریب سے ہوگا جس میں اماراتی قیادت شریک ہوگی۔ اگرچہ تقریب کے مقام کا باضابطہ اعلان نہیں کیا گیا، تاہم امکان ہے کہ یہ پروگرام کسی اہم ثقافتی اور قومی مقام پر 2 دسمبر کو منعقد ہوگا۔
نیشنل ڈے کی تقریبات کے دوران ملک بھر میں روایتی پریڈز، آتشبازی، ثقافتی نمائشیں اور مختلف عوامی پروگرامز بھی منعقد کیے جائیں گے، جن میں شہریوں اور غیر ملکی کمیونٹی کی بڑی تعداد شریک ہوگی۔
