لاہور: پاکستان کی جانب سے پاک بھارت میچ کے ریفری اینڈی پائیکرافٹ کو ہٹانے کے مطالبے کے بعد ایشین کرکٹ کونسل (اے سی سی) معاملہ سلجھانے کے لیے متحرک ہوگئی ہے۔
جیو نیوز کے مطابق پاکستان کرکٹ بورڈ (پی سی بی) اپنے سخت مؤقف پر قائم ہے اور واضح کردیا ہے کہ اگر اینڈی پائیکرافٹ کو نہ ہٹایا گیا تو پاکستان بقیہ میچز کھیلنے سے انکار کر دے گا۔
ادھر بھارتی میڈیا کا کہنا ہے کہ ایشین کرکٹ کونسل نے بحران کو حل کرنے کے لیے درمیانی راستہ نکالنے کی کوششیں شروع کردی ہیں۔ ذرائع کے مطابق تجویز دی گئی ہے کہ پورے ٹورنامنٹ کے بجائے صرف پاکستان کے میچز سے پائیکرافٹ کو ہٹایا جائے۔ اس حوالے سے یہ امکان ظاہر کیا جارہا ہے کہ پاکستان کے میچز میں پائیکرافٹ کی جگہ رچی رچرڈسن کو ریفری تعینات کیا جا سکتا ہے۔
واضح رہے کہ گزشتہ روز بھارت کے خلاف میچ میں ریفری کے رویے پر سخت ردعمل دیتے ہوئے پاکستان نے اعلان کیا تھا کہ اگر ریفری تبدیل نہ کیا گیا تو ٹیم ایشیا کپ کے مزید میچز میں شرکت نہیں کرے گی۔
