اسلام آباد / لاہور: پاکستان کرکٹ بورڈ (پی سی بی) کی جانب سے ایشیا کپ میں پاک بھارت میچ کے ریفری اینڈی پائی کرافٹ کو ہٹانے کا مطالبہ انٹرنیشنل کرکٹ کونسل (آئی سی سی) نے مسترد کردیا ہے۔
ذرائع کے مطابق آئی سی سی نے گزشتہ رات ہی پی سی بی کو اپنے فیصلے سے آگاہ کر دیا تھا۔ اس پیشرفت کے بعد مستقبل کے لائحہ عمل پر غور کے لیے چیئرمین پی سی بی محسن نقوی کی آج اہم حکومتی عہدیداران سے مشاورت متوقع ہے۔
ذرائع کا کہنا ہے کہ پی سی بی آئندہ چند گھنٹوں میں ایشیا کپ کے حوالے سے اپنا مؤقف جاری کرے گا۔ امکان ظاہر کیا جارہا ہے کہ اگر پاکستان کا مطالبہ نہ مانا گیا تو قومی ٹیم ایشیا کپ سے دستبردار ہو سکتی ہے۔
بھارتی میڈیا نے بھی دعویٰ کیا ہے کہ آئی سی سی نے میچ ریفری کی تبدیلی سے متعلق پاکستان کی درخواست کو باضابطہ طور پر مسترد کر دیا ہے۔ دوسری جانب پی سی بی کا کہنا ہے کہ وہ جلد اس حوالے سے اپنا ردعمل دے گا۔
واضح رہے کہ پاکستان نے بھارت کے خلاف میچ کے دوران ہینڈ شیک کے معاملے پر ریفری اینڈی پائی کرافٹ کے رویے کو بنیاد بنا کر ایشیا کپ سے ہٹانے کا مطالبہ کیا تھا۔
