میریان تھانے اور مزنگ چوکی پر حملہ پسپا، 3 دہشت گرد ہلاک، 4 زخمی، 3 پولیس اہلکار معمولی زخمی
خیبرپختونخوا کے اضلاع بنوں اور کرک میں پولیس نے دہشت گردوں کے حملے دلیری اور حکمت عملی سے ناکام بنا دیے۔ بنوں میں دہشت گردوں نے پہلے میریان تھانے اور بعد ازاں مزنگ چوکی کو نشانہ بنایا تاہم پولیس جوانوں نے بھرپور جواب دیتے ہوئے دونوں حملے پسپا کر دیے۔
ریجنل پولیس آفیسر (آر پی او) بنوں سجاد خان کے مطابق میریان تھانے پر حملہ تقریباً 20 منٹ میں ناکام بنایا گیا۔ بعد ازاں درجنوں دہشت گردوں نے بھاری ہتھیاروں سے مزنگ چوکی پر حملہ کیا، جہاں ایک گھنٹے تک فائرنگ کا تبادلہ جاری رہا۔ پولیس کارروائی کے دوران 3 دہشت گرد ہلاک جبکہ 4 زخمی ہوئے، جنہیں ان کے ساتھی اپنے ساتھ لے کر فرار ہوگئے۔ فائرنگ کے تبادلے میں 3 پولیس اہلکار معمولی زخمی ہوئے۔
دوسری جانب ضلع کرک کے گرگری تھانے پر بھی دہشت گردوں نے حملہ کرنے کی کوشش کی لیکن پولیس کی بروقت جوابی کارروائی کے باعث دہشت گرد تھانے کے قریب نہ آسکے اور فائرنگ کے تبادلے کے بعد فرار ہو گئے۔پولیس حکام کا کہنا ہے کہ علاقے میں سرچ آپریشن جاری ہے اور دہشت گردوں کو کسی صورت فرار نہیں ہونے دیا جائے گا۔
