بلوچستان کے ضلع شیرانی میں دہشت گردوں نے رات گئے پولیس اور لیویز کے تھانوں پر بیک وقت حملہ کر دیا۔ حملے کے نتیجے میں ایک پولیس اہلکار اور ایک لیویز اہلکار شہید جبکہ چھ اہلکار شدید زخمی ہو گئے۔ زخمیوں کو سول اسپتال ژوب منتقل کر دیا گیا ہے جہاں ایمرجنسی نافذ کرتے ہوئے اضافی طبی عملہ طلب کر لیا گیا ہے۔
ڈپٹی کمشنر شیرانی کے مطابق دہشت گردوں کے حملے میں تھانوں کے کمیونیکیشن سسٹم کو بھی نقصان پہنچا جس کے باعث دیگر علاقوں سے رابطہ متاثر ہوا۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے اور دہشت گردوں کی تلاش جاری ہے۔
عینی شاہدین کے مطابق دہشت گرد جدید اسلحے سے لیس تھے اور اچانک فائرنگ شروع کر دی جس سے علاقے میں خوف و ہراس پھیل گیا۔ واقعے کے بعد شیرانی اور ملحقہ علاقوں میں سیکیورٹی مزید سخت کر دی گئی ہے۔یاد رہے کہ ضلع شیرانی بلوچستان اور خیبر پختونخوا کی سرحد پر واقع ہے اور اس حساس علاقے میں ماضی میں بھی پولیس اور سیکیورٹی فورسز کو متعدد بار دہشت گرد حملوں کا سامنا کرنا پڑا ہے۔
