یورپی کمیشن کے آج ہونے والے اجلاس میں اسرائیل پر نئی پابندیاں عائد کیے جانے کا امکان ہے۔
یورپی یونین نے غزہ میں اسرائیلی زمینی کارروائی کی شدید مذمت کرتے ہوئے اسے پہلے سے سنگین انسانی بحران کو مزید تباہ کن قرار دیا ہے۔
یورپی یونین کی خارجہ پالیسی کی سربراہ کایا کالاس نے کہا ہے کہ زمینی حملے سے مزید ہلاکتیں اور تباہی ہوگی۔
ان کے مطابق اجلاس میں ایسے اقدامات زیرِ غور آئیں گے جن کے ذریعے اسرائیلی حکومت پر جنگ بندی کے لیے دباؤ بڑھایا جائے گا۔
امکان ہے کہ ان اقدامات میں اسرائیل کو دی گئی تجارتی مراعات کی معطلی، انتہاپسند وزیروں اور پرتشدد آبادکاروں پر پابندیاں شامل ہوں گی۔
کایا کالاس کے مطابق یہ پیغام واضح ہوگا کہ یورپی یونین غزہ میں فوری جنگ بندی کا مطالبہ کر رہی ہے۔
