بھاری اسلحہ و بارودی مواد برآمد، مزید دہشتگردوں کی تلاش جاری
راولپنڈی (دنیا نیوز) سکیورٹی فورسز نے بلوچستان کے ضلع خضدار میں خفیہ معلومات کی بنیاد پر آپریشن کرتے ہوئے 5 بھارتی حمایت یافتہ دہشتگردوں کو ہلاک کر دیا۔
آئی ایس پی آر کے مطابق آپریشن 14 اور 15 ستمبر کی درمیانی شب کیا گیا جس میں ہلاک دہشتگرد متعدد دہشتگردی کی وارداتوں میں ملوث تھے۔ آپریشن کے دوران بھاری مقدار میں اسلحہ اور بارودی مواد بھی برآمد کر لیا گیا۔
ترجمان پاک فوج کا کہنا ہے کہ علاقے میں مزید خوارج کی موجودگی کے پیش نظر سرچ آپریشن جاری ہے اور بھارتی حمایت یافتہ دہشتگردوں کے مکمل خاتمے تک کارروائیاں جاری رہیں گی۔وفاقی وزیر داخلہ محسن نقوی نے خضدار آپریشن میں کامیابی پر سکیورٹی فورسز کو خراج تحسین پیش کیا اور کہا کہ فورسز نے ایک بار پھر دہشتگردوں کے مذموم عزائم کو ناکام بنایا ہے۔
ان کا کہنا تھا کہ قوم سکیورٹی فورسز کے ساتھ شانہ بشانہ کھڑی ہے اور دہشتگردوں کے مکمل خاتمے تک آپریشنز جاری رہیں گے۔
