بالی وڈ اداکارہ دیشا پٹانی کے گھر کے باہر اندھا دھند فائرنگ کی ویڈیو منظرعام پر
بھارتی میڈیا رپورٹس کے مطابق گزشتہ جمعہ کی شب تقریباً 3 بجکر 30 منٹ پر دیشا پٹانی کے بریلی میں واقع گھر کے باہر 2 نامعلوم موٹر سائیکل سواروں نے اندھا دھند فائرنگ کی۔ فائرنگ کے بعد ملزمان موقع سے فرار ہوگئے۔ یہ واقعہ سی سی ٹی وی کیمرے میں ریکارڈ ہوگیا، جس کی فوٹیج اب منظر عام پر آچکی ہے۔
ویڈیو میں واضح طور پر دیکھا جاسکتا ہے کہ دونوں افراد موٹر سائیکل پر اداکارہ کے گھر کے قریب پہنچتے ہیں، جن میں سے ایک حملہ آور فائرنگ کرتا ہے اور پھر دونوں فرار ہوجاتے ہیں۔ یہ فوٹیج بھارتی میڈیا کے ساتھ ساتھ سوشل میڈیا پر بھی تیزی سے وائرل ہورہی ہے۔
واضح رہے کہ اس واقعے کی ذمہ داری بدنام زمانہ گینگسٹر روہت گودارا اور گولڈی برار گینگ نے سوشل میڈیا پر پوسٹ کے ذریعے قبول کرلی ہے۔ بھارتی میڈیا رپورٹس کے مطابق دیشا پٹانی کی بہن خوشبو پٹانی کی جانب سے گینگ کے روحانی رہنماؤں پریمانند مہاراج اور انیرودھاچاریہ جی مہاراج کے بارے میں مبینہ توہین آمیز بیان دیا گیا تھا، جس کے ردعمل میں یہ حملہ کیا گیا۔
