امریکی صدر ڈونلڈ ٹرمپ کے اعزاز میں برطانیہ کے شاہی خاندان کی جانب سے ونزر کاسل میں شاندار عشائیہ دیا گیا۔ اس موقع پر بادشاہ چارلس نے امریکی صدر کو خراجِ تحسین پیش کرتے ہوئے کہا کہ دنیا کے پیچیدہ تنازعات کے حل میں ٹرمپ کی کوششیں قابلِ تعریف ہیں اور امن کے لیے ان کا عزم لائقِ قدر ہے۔
صدر ٹرمپ نے عشائیے سے خطاب میں کہا کہ امریکا اور برطانیہ کے تعلقات دہائیوں سے فخر کا باعث ہیں جبکہ برطانیہ کا دورہ ان کی زندگی کے بڑے اعزازات میں سے ایک ہے۔ شاہی محل پہنچنے پر شاہی خاندان نے صدر ٹرمپ اور خاتونِ اول میلانیا ٹرمپ کا پرتپاک استقبال کیا۔
اس موقع پر صدر ٹرمپ نے شاہ چارلس اور ملکہ کمیلا کے ہمراہ گارڈ آف آنر کا معائنہ کیا اور فوجی تقریب میں رائل فورس کی شاندار پریڈ کے ساتھ طیاروں کا رنگا رنگ فلائی پاسٹ بھی دیکھا۔
صدر بننے کے بعد ٹرمپ کا یہ برطانیہ کا دوسرا سرکاری دورہ ہے، جس میں امریکا اور برطانیہ کے درمیان سرمایہ کاری کے کئی معاہدوں کی توقع ظاہر کی جارہی ہے۔ امریکی صدر آج برطانوی وزیراعظم سر کیئر اسٹارمر سے بھی ملاقات کریں گے۔
