دبئی: ایشیا کپ ٹی ٹوئنٹی ٹورنامنٹ کے اہم میچ میں پاکستان نے متحدہ عرب امارات کو 41 رنز سے شکست دے کر ایونٹ کے سپر فور مرحلے کے لیے کوالیفائی کرلیا۔ پاکستان کے 147 رنز کے ہدف کے تعاقب میں یو اے ای کی پوری ٹیم 18 ویں اوور میں 105 رنز بناکر آؤٹ ہوگئی۔
گروپ اے کے اس میچ میں یو اے ای نے ٹاس جیت کر پاکستان کو پہلے بیٹنگ کی دعوت دی۔ پاکستان ٹیم میں 2 تبدیلیاں کی گئیں، سفیان مقیم اور فہیم اشرف کی جگہ حارث رؤف اور خوشدل شاہ کو شامل کیا گیا۔
پاکستان کی اننگز
پاکستان نے مقررہ 20 اوورز میں 9 وکٹوں پر 146 رنز اسکور کیے۔ فخر زمان نے شاندار 50 رنز کی اننگز کھیلی جبکہ شاہین شاہ آفریدی 14 گیندوں پر 29 رنز بناکر ناٹ آؤٹ رہے۔ دیگر بلے بازوں میں صائم ایوب صفر، صاحبزادہ فرحان 5، کپتان سلمان علی آغا 20، حسن نواز 3، خوشدل شاہ اور محمد نواز 4، 4 جبکہ محمد حارث 18 رنز بناکر آؤٹ ہوئے۔
یو اے ای کے جنید صدیق نے بہترین بولنگ کرتے ہوئے 18 رنز کے عوض 4 کھلاڑیوں کو پویلین بھیجا جبکہ سمرن جیت سنگھ نے 3 وکٹیں حاصل کیں۔
یو اے ای کی اننگز
ہدف کے تعاقب میں یو اے ای کے بلے باز پاکستانی بولرز کے سامنے جم نہ سکے۔ راہول چوپڑا نے سب سے زیادہ 35 رنز بنائے، تاہم پوری ٹیم 105 رنز پر ڈھیر ہوگئی۔ پاکستان کی جانب سے شاہین شاہ آفریدی، حارث رؤف اور ابرار احمد نے 2، 2 وکٹیں حاصل کیں جبکہ صائم ایوب اور سلمان علی آغا نے ایک، ایک کھلاڑی کو آؤٹ کیا۔
واضح رہے کہ ایشیا کپ میں گروپ اے سے بھارت اور پاکستان نے سپر فور مرحلے کے لیے کوالیفائی کرلیا ہے جبکہ عمان اور یو اے ای ٹورنامنٹ سے باہر ہوگئے ہیں۔
