راولپنڈی: انسداد دہشت گردی عدالت نے نو مئی جی ایچ کیو حملہ کیس میں بانی تحریک انصاف عمران خان کی جانب سے دائر کی گئی دو درخواستیں خارج کر دی ہیں۔
کیس کی سماعت جج امجد علی شاہ نے کی، جس میں عمران خان کے وکلاء فیصل ملک اور سلمان اکرم راجہ، اور پراسیکیوٹرز ظہیر شاہ اور اکرام امین منہاس عدالت میں موجود تھے۔بانی پی ٹی آئی کی درخواستوں میں عدالتی کارروائی کی فوٹیج فراہم کرنے اور جیل ٹرائل کی منتقلی سے متعلق ہائی کورٹ کے آرڈرز تک سماعت روکنے کی استدعا شامل تھی۔ وکیل فیصل ملک نے عدالت کو بتایا کہ موکل کی مشاورت کے بغیر وہ سماعت کا حصہ نہیں بننا چاہتے، تاہم عدالت نے کہا کہ سابقہ سماعت میں بانی سے بات کرائی گئی تھی لیکن انہوں نے عدالتی کارروائی کا بائیکاٹ کیا۔
عدالت نے وکلاء کو ہدایت کی کہ متعلقہ احکامات کو ہائی کورٹ میں چیلنج کریں اور عدالتی کارروائی روکی نہیں جا سکتی۔ پراسیکیوٹرز نے وکلا صفائی پر عدالت کا وقت ضائع کرنے اور سماعت کا بائیکاٹ کرنے کا الزام عائد کیا۔ عدالت نے واضح کیا کہ ٹرائل ہائی کورٹ کے احکامات کے مطابق جاری رہے گا اور درخواستیں خارج کر دی گئیں۔
