ابوظبی میں کھیلے گئے ایشیا کپ ٹی ٹوئنٹی کے سپر فور مرحلے کے اہم میچ میں پاکستان اور سری لنکا کے درمیان نہ صرف زبردست کرکٹ دیکھنے کو ملی بلکہ کھلاڑیوں کی دلچسپ سیلیبریشن نے بھی شائقین کو خوب محظوظ کیا۔
میچ کے دوران سری لنکن آل راؤنڈر وانندو ہسارنگا اور پاکستانی اسپنر ابرار احمد کے درمیان ایک منفرد مقابلہ دیکھنے میں آیا۔ ہسارنگا نے پہلے فخر زمان کا شاندار کیچ تھام کر ابرار احمد کے مخصوص جشن کی نقالی کی۔ بعد ازاں صائم ایوب کو بولڈ کرنے کے بعد بھی انہوں نے ابرار کے ہی انداز میں سیلیبریٹ کیا۔
تاہم ابرار احمد نے بھی جواب میں کمال کر دیا۔ 13ویں اوور کی پہلی گیند پر انہوں نے ہسارنگا کو بولڈ کیا اور فوراً اُنہی کے انداز میں جشن منایا۔ دونوں کھلاڑیوں کے اس دوستانہ اور دل چسپ تبادلے پر سوشل میڈیا پر کرکٹ شائقین نے خوب داد دی اور ان کی کرکٹ اسپرٹ کی تعریف کی۔
میچ کے اختتام پر ابرار احمد اور ہسارنگا نے بہترین اسپورٹس مین اسپرٹ کا مظاہرہ کرتے ہوئے ایک دوسرے سے گلے مل کر اس یادگار لمحے کو مزید خوشگوار بنا دیا۔
ایشیا کپ کے سپر فور مرحلے کے اس اہم مقابلے میں پاکستان نے سری لنکا کو 5 وکٹوں سے شکست دے کر قیمتی دو پوائنٹس حاصل کیے۔ پاکستان نے سری لنکا کا 134 رنز کا ہدف 18 اوورز میں 5 وکٹوں کے نقصان پر باآسانی حاصل کرلیا۔
یہ میچ نہ صرف پاکستان کی فتح بلکہ دونوں کھلاڑیوں کی خوش مزاجی اور باہمی عزت و احترام کے باعث یادگار بن گیا۔
