اسلام آباد:رواں مالی سال کے پہلے مہینے جولائی کے دوران سرکاری بجلی تقسیم کار کمپنیوں (ڈسکوز) کے مجموعی نقصانات 87 ارب روپے ریکارڈ کیے گئے۔
تفصیلات کے مطابق 87 ارب میں سے 41 ارب روپے کے نقصانات ڈسکوز کی نا اہلی جبکہ 46 ارب روپے بجلی وصولیوں میں کمی کے باعث ہوئے۔حکام کے مطابق جولائی 2024 کے مقابلے میں اس سال جولائی میں ڈسکوز کے مجموعی نقصانات میں 60 ارب روپے کی کمی دیکھی گئی۔ گزشتہ سال جولائی میں یہ نقصانات 147 ارب روپے تک پہنچ گئے تھے۔
رواں مالی سال کے پہلے ہی ماہ میں یہ کمی خوش آئند سمجھی جا رہی ہے، تاہم نقصانات کا سلسلہ برقرار رہنے کے باعث قومی خزانے کو اب بھی اربوں روپے کا نقصان برداشت کرنا پڑ رہا ہے۔
