اسرائیل کا محاصرہ توڑ کر غزہ جانے کے لیے بین الاقوامی آبی راستے میں موجود گلوبل صمود فلوٹیلا میں شامل کشتی پر ڈرون حملے کی ویڈیو سامنے آگئی۔
درجنوں کشتیوں پر مشتمل گلوبل صمود فلوٹیلا غزہ کی جانب رواں دواں ہے اور اس وقت یونان کے ساحل کے قریب بین الاقوامی آبی راستے سے گزر رہا ہے، جس میں پاکستان کے ایوانِ بالا سینیٹ کے سابق رکن مشتاق احمد سمیت سیکڑوں افراد موجود ہیں۔
سابق سینیٹر مشتاق احمد نے سوشل میڈیا پر جاری ایک پوسٹ میں بتایا کہ رات کے وقت غزہ کے لیے جانے والے پرامن گلوبل صمود فلوٹیلا پر 10 ڈرون حملے کیے گئے، بارودی مواد اور آگ کے گولے پھینکے گئے لیکن ہمارا عزم پختہ اور حوصلے بلند ہیں، ہم ان شاء اللہ غزہ پہنچ کر رہیں گے۔
مشتاق احمد نے عالمی برادری سے اپیل کی کہ گلوبل صمود فلوٹیلا پر اسرائیلی نسل پرست اور ناجائز ریاست کے ڈرون حملوں کا نوٹس لیا جائے اور حکومتِ پاکستان اس معاملے کو عالمی فورمز پر اٹھائے۔
انہوں نے بتایا کہ اسرائیلی ریاست کی جانب سے ایسا خطرناک کیمیکل پھینکا گیا جسے سونگھنے اور چھونے سے شدید نقصان ہوسکتا ہے۔ یہ سب گلوبل صمود فلوٹیلا کو خوفزدہ کر کے غزہ جانے سے روکنے کی نفسیاتی جنگ ہے لیکن ہم رکیں گے نہیں۔
مشتاق احمد کا کہنا تھا کہ ہم غزہ کا محاصرہ ختم کریں گے اور وہاں انسانی ہمدردی کی بنیاد پر امداد پہنچائیں گے۔ ایک چھوٹی سی ریاست نے اپنی دہشت گردی اور بدمعاشی سے پوری دنیا کو یرغمال بنایا ہوا ہے، اس لیے میری تمام لوگوں سے اپیل ہے کہ آپ بھی باہر نکلیں اور اس ناجائز صیہونی ریاست کے خلاف ہر جگہ آواز بلند کریں۔
انہوں نے وزیراعظم شہباز شریف کو مخاطب کرتے ہوئے کہا کہ اس معاملے کو اقوامِ متحدہ اور او آئی سی سمیت ہر بین الاقوامی فورم پر اٹھائیں، کیونکہ جو کام ہم کرنے جا رہے ہیں یہ او آئی سی کے منشور میں شامل ہے اور انہیں کرنا چاہیے تھا لیکن یہ کام اب گلوبل صمود فلوٹیلا کر رہا ہے۔
مشتاق احمد نے سوشل میڈیا پر رات کو گلوبل صمود فلوٹیلا کی کشتی پر ہونے والے حملے کی ویڈیو بھی شیئر کی۔
