ایشیا کپ سپر 4 مرحلے میں پاکستان نے سری لنکا کو 5 وکٹوں سے شکست دے کر 2 اہم پوائنٹس حاصل کرلیے۔
سپر 4 کے اس میچ میں پاکستان اور سری لنکا کی ٹیمیں ابوظبی میں آمنے سامنے آئیں جہاں قومی ٹیم کے کپتان سلمان علی آغا نے ٹاس جیت کر سری لنکا کو بیٹنگ کی دعوت دی۔
سری لنکن ٹیم نے مقررہ 20 اوورز میں 8 وکٹوں کے نقصان پر 133 رنز بنائے، کامندو مینڈس 50 رنز کے ساتھ نمایاں رہے۔
جواب میں پاکستان نے 134 رنز کا ہدف 18 اوورز میں 5 وکٹوں کے نقصان پر مکمل کر کے فائنل میں رسائی کی امیدیں برقرار رکھیں اور پوائنٹس ٹیبل پر اہم دو پوائنٹس اپنے نام کیے۔
پوائنٹس ٹیبل کی صورتحال
سپر 4 مرحلے کی ٹاپ دو ٹیمیں فائنل کے لیے کوالیفائی کریں گی، ہر ٹیم کو 3 میچ کھیلنے ہیں۔
بھارت: ایک میچ کھیل کر 2 پوائنٹس کے ساتھ پہلے نمبر پر
پاکستان: دو میچوں میں ایک کامیابی کے بعد 2 پوائنٹس کے ساتھ دوسرے نمبر پر
بنگلادیش: ایک میچ کھیل کر 2 پوائنٹس کے ساتھ تیسرے نمبر پر
سری لنکا: دو میچز میں شکست کے بعد صفر پوائنٹس کے ساتھ آخری نمبر پر
پاکستان کا فائنل تک پہنچنے کا آسان راستہ
فائنل کے لیے پاکستان کے لیے سب سے سیدھا راستہ یہ ہے کہ قومی ٹیم اپنا آخری میچ بنگلادیش کے خلاف جیتے اور بھارت اپنے بقیہ دونوں میچوں (بنگلادیش اور سری لنکا کے خلاف) میں کامیاب ہو۔ اس صورت میں بھارت 6 پوائنٹس اور پاکستان 4 پوائنٹس کے ساتھ فائنل میں پہنچ جائیں گے۔
اگر بھارت بدھ کو بنگلادیش سے ہار گیا تو معاملہ نیٹ رن ریٹ پر بھی جا سکتا ہے، جس سے فائنل کے لیے مقابلہ مزید سخت ہو جائے گا۔
