دبئی: انٹرنیشنل کرکٹ کونسل (آئی سی سی) نے تازہ ترین ٹی ٹوئنٹی کھلاڑیوں کی رینکنگ جاری کر دی جس میں پاکستانی اسٹارز نے نمایاں پیش رفت حاصل کی ہے۔
بولرز کی فہرست میں بھارت کے ورن چکرورتی بدستور سرفہرست ہیں، نیوزی لینڈ کے جیکب ڈفی دوسرے جبکہ ویسٹ انڈیز کے عقیل حسین تیسرے نمبر پر ہیں۔ پاکستان کے اسپنر ابرار احمد شاندار کارکردگی دکھا کر 12 ویں پوزیشن سے چھلانگ لگاتے ہوئے چوتھے نمبر پر پہنچ گئے۔ فاسٹ بولر شاہین شاہ آفریدی بھی دو درجے بہتری کے ساتھ 25 ویں اور حارث رؤف نو درجے ترقی کے بعد 28 ویں پوزیشن تک پہنچنے میں کامیاب ہوئے۔
محمد نواز 13 درجے تنزلی کے بعد 46 ویں جبکہ صوفیان مقیم تین درجے گر کر 14 ویں نمبر پر آ گئے۔ بھارتی آل راؤنڈر ہاردک پانڈیا چھ درجے بہتری کے بعد 60 ویں مقام پر پہنچے۔
بیٹرز کی رینکنگ میں بھارت کے ابھیشک شرما پہلی پوزیشن پر بدستور قابض ہیں۔ انگلینڈ کے فل سالٹ دوسرے نمبر پر ہیں جبکہ بھارت کے تلک ورما ایک درجہ اوپر آ کر تیسرے نمبر پر آگئے۔ پاکستان کے صاحبزادہ فرحان نے شاندار کارکردگی سے 31 درجے جست لگاتے ہوئے 24 ویں نمبر پر جگہ بنائی، صائم ایوب آٹھ درجے تنزلی کے بعد 55 ویں پوزیشن پر پہنچے۔ قومی کپتان سلمان علی آغا اور فخر زمان بھی تین تین درجے بہتری کے بعد بالترتیب 65 ویں اور 66 ویں نمبر پر آگئے۔
آل راؤنڈرز کی کیٹیگری میں بھارت کے ہاردک پانڈیا بدستور پہلے نمبر پر ہیں، افغانستان کے راشد خان دوسرے اور زمبابوے کے سکندر رضا تیسرے نمبر پر موجود ہیں۔ پاکستان کے صائم ایوب پانچویں نمبر پر برقرار ہیں، محمد نواز ایک درجہ اوپر آ کر 17 ویں اور فہیم اشرف 12 درجے ترقی کے بعد 39 ویں نمبر پر پہنچنے میں کامیاب ہوئے۔
