دبئی / لاہور: انٹرنیشنل کرکٹ کونسل (آئی سی سی) نے بھارتی بلے باز سوریا کمار یادیو کے خلاف پاکستان کرکٹ بورڈ (پی سی بی) کی جانب سے جمع کرائی گئی شکایت کو ابتدائی طور پر منظور کرتے ہوئے کیس پر مزید کارروائی کا عندیہ دے دیا ہے۔
ذرائع کے مطابق یہ معاملہ پاک بھارت حالیہ گروپ میچ کے بعد سامنے آیا، جب سوریا کمار یادیو نے مبینہ طور پر سیاسی نوعیت کے جملے ادا کیے، جنہیں کھیل کی روح اور ضابطۂ اخلاق کے منافی قرار دیا جا رہا ہے۔ پاکستان نے اس واقعے پر دو آفیشل رپورٹس آئی سی سی کو جمع کرائیں، جن میں مؤقف اختیار کیا گیا کہ سوریا کمار کا رویہ کھیل کی ساکھ کو متاثر کرنے والا تھا۔
میچ ریفری رچی رچڈسن نے بھی ای میل کے ذریعے اس مؤقف کی تائید کی ہے اور کہا ہے کہ کھلاڑی کا طرزِ عمل کرکٹ کے وقار کے خلاف تھا۔ آئی سی سی ذرائع کے مطابق شواہد کا تفصیلی جائزہ جاری ہے اور باضابطہ سماعت آئندہ چند روز میں متوقع ہے۔
امکان ظاہر کیا جا رہا ہے کہ اگر ضابطۂ اخلاق کی خلاف ورزی ثابت ہو گئی تو سوریا کمار یادیو کو جرمانے یا معطلی جیسے اقدامات کا سامنا کرنا پڑ سکتا ہے۔
