کراچی: پاکستان اسٹاک مارکیٹ میں تیزی کا سلسلہ جاری ہے اور ہنڈرڈ انڈیکس نے پہلی بار ایک لاکھ 61 ہزار پوائنٹس کی تاریخی حد عبور کر لی۔ کاروباری ہفتے کے آخری روز مارکیٹ کے آغاز پر زبردست تیزی دیکھنے میں آئی اور 1900 سے زائد پوائنٹس اضافے کے ساتھ انڈیکس ایک لاکھ 61 ہزار 291 پوائنٹس کی بلند ترین سطح تک پہنچ گیا۔
اس سے قبل گزشتہ روز کے اختتام پر ہنڈرڈ انڈیکس 1043 پوائنٹس اضافے کے ساتھ ایک لاکھ 59 ہزار 280 پوائنٹس پر بند ہوا تھا۔ دوران ٹریڈنگ سیمنٹ، کمرشل بینکنگ، تیل و گیس کی تلاش کرنے والی کمپنیاں، او ایم سیز، بجلی پیدا کرنے والے ادارے اور ریفائنریز میں بھرپور خریداری دیکھنے میں آئی جبکہ ماری، حبکو، اے آر ایل، اوجی ڈی سی، پی پی ایل، پی او ایل اور پی ایس او کے شیئرز بھی مثبت زون میں ٹریڈ ہوتے رہے۔
