اسلام آباد: پاکستان میں گدھوں کی منظم افزائش نسل کے لیے چینی کمپنی سنگ ینگ 3 کروڑ 70 لاکھ ڈالر کی بھاری سرمایہ کاری کرے گی جس کے تحت ملک بھر میں 40 خصوصی فارم قائم کیے جائیں گے۔
وزارت غذائی تحفظ کے ذرائع کے مطابق اس منصوبے کا مقصد سالانہ 80 ہزار گدھوں کی پیداوار حاصل کرنا ہے تاکہ پاکستان عالمی سپلائی چین کا حصہ بن سکے۔
تفصیلات کے مطابق سائنسی بنیادوں پر افزائش نسل کے لیے زرعی یونیورسٹی پشاور میں جدید لیبارٹری بھی قائم کی جائے گی جہاں گدھوں کی بریڈنگ کے لیے تحقیق اور جینیاتی بہتری پر کام ہوگا۔ ابتدائی تین سے پانچ سال تک افزائش کا عمل تیزی سے جاری رکھا جائے گا اور اس دوران ہر ماہ 10 ہزار گدھوں کا گوشت چین برآمد کیا جائے گا۔
ذرائع کے مطابق منصوبے کے تحت گدھوں کی ہڈیاں اور گوشت صرف برآمد کیے جائیں گے جبکہ مقامی فروخت پر مکمل پابندی ہوگی۔ یہ سرمایہ کاری نہ صرف پاکستان کے زرعی اور لائیو اسٹاک شعبے کے لیے ایک نئی معاشی سرگرمی پیدا کرے گی بلکہ برآمدات میں اضافے اور دیہی معیشت کی مضبوطی میں بھی اہم کردار ادا کرے گی۔
