پاکستان ٹیلی کمیونیکیشن اتھارٹی (پی ٹی اے) نے وائی فائی سیون کے لیے 6 گیگا ہرٹز بینڈ کے استعمال کی منظوری دے دی ہے، جس کے بعد پاکستان ایشیا کے ان اولین ممالک میں شامل ہوگیا ہے جو اس جدید ٹیکنالوجی کو اپنا رہے ہیں۔
پی ٹی اے کے مطابق آئندہ آنے والی تمام وائی فائی جنریشنز کے لیے 6 گیگا ہرٹز بینڈ میں استعمال کی اجازت دے دی گئی ہے، جس سے ڈیجیٹل انفراسٹرکچر مزید تیز اور جدید ہوگا۔
وائی فائی سیون تیز ترین ڈیٹا ریٹس، نہایت کم لیٹنسی اور بہتر کارکردگی فراہم کرتا ہے۔ یہ ٹیکنالوجی گھروں، چھوٹے کاروبار اور تعلیمی اداروں میں تیز تر کنیکٹیویٹی کو یقینی بنائے گی۔
مزید برآں یہ جدید وائرلیس نظام صحت عامہ کے مراکز اور اسمارٹ سٹی منصوبوں کے لیے بھی تیز رفتار اور مستحکم کنیکٹیویٹی فراہم کرے گا، جو ملک میں جدید ڈیجیٹل سہولیات کے فروغ کی جانب ایک بڑا قدم ہے۔
