انٹرنیشنل کرکٹ کونسل (آئی سی سی) نے پاکستانی کرکٹرز حارث رؤف اور صاحبزادہ فرحان کے خلاف ہونے والی سماعت کا فیصلہ تاحال جاری نہیں کیا، جس پر چیئرمین پاکستان کرکٹ بورڈ (پی سی بی) محسن نقوی نے شدید تحفظات کا اظہار کیا ہے۔
حارث رؤف اور صاحبزادہ فرحان کے خلاف آئی سی سی کی سماعت مکمل ہوئے دو روز گزر چکے ہیں لیکن فیصلہ سامنے نہیں آیا۔ گزشتہ روز ایک کرکٹ ویب سائٹ نے دعویٰ کیا تھا کہ میچ ریفری نے حارث رؤف کو آئی سی سی کوڈ آف کنڈکٹ کی خلاف ورزی کا مرتکب قرار دیتے ہوئے ان پر میچ فیس کا 30 فیصد جرمانہ عائد کیا، جبکہ صاحبزادہ فرحان کو کسی کارروائی کے بجائے صرف وارننگ دی گئی۔
تاہم آئی سی سی کی جانب سے باضابطہ اعلان نہ ہونے پر محسن نقوی نے ایکس پر اپنے پیغام میں سوال اٹھاتے ہوئے کہا کہ آپ کو اپنا توازن قائم رکھنے کی وجوہات بیان کرنے میں اور کتنا وقت درکار ہے؟
پی سی بی چیئرمین کے اس ردِعمل نے معاملے کو مزید اہم بنا دیا ہے اور شائقین بھی آئی سی سی کے فیصلے کے منتظر ہیں۔
