لیہ:مہم کے دوران 5 سال تک کے 4 لاکھ سے زائد بچوں کو ویکسین دی جائے گی
لیہ(نیوز رپورٹر) ڈپٹی کمشنر امیر ابیدار کی زیر صدارت انسداد پولیو مہم کے انتظامات کا جائزہ اجلاس منعقد ہوا۔ اجلاس میں ایڈیشنل ڈپٹی کمشنرز شاہد ملک، شبیراحمد ڈوگر، اسسٹنٹ کمشنر حارث حمید خان، سی ای او ہیلتھ ڈاکٹر شاہد ریاض، ایم ایس ڈی ایچ کیو ہسپتال ڈاکٹر غلام محی الدین، ڈاکٹر محمد یونس کلیہ، ڈی ای او گل شیر، انچارج سیکیورٹی برانچ محمد یاسر گورمانی، ڈبلیو ایچ او حکام اور دیگر افسران شریک ہوئے۔
ڈپٹی کمشنر نے اجلاس سے خطاب کرتے ہوئے کہا کہ ضلع لیہ میں انسداد پولیو کی چار روزہ مہم 13 سے 16 اکتوبر تک جاری رہے گی جس دوران پانچ سال تک کی عمر کے چار لاکھ سے زائد بچوں کو پولیو کے قطرے پلائے جائیں گے۔ اس موقع پر بچوں کو وٹامن اے کی خوراک بھی فراہم کی جائے گی۔ انہوں نے کہا کہ تمام متعلقہ ادارے مہم کی کامیابی کے لئے بھرپور کردار ادا کریں
اسسٹنٹ کمشنرز اپنی تحصیلوں میں پولیو ٹیموں کی ٹریننگ کا جائزہ لیں جبکہ ناقص کارکردگی پر سخت کارروائی کی جائے گی۔ ڈپٹی کمشنر نے واضح کیا کہ عوام میں شعور و آگاہی کے لئے مہم کو مزید مؤثر بنایا جائے تاکہ ضلع پولیو فری اعزاز برقرار رکھ سکے۔ کچے اور تھل کے علاقے، خانہ بدوش بچوں اور داخلی و خارجی راستوں پر خصوصی توجہ دینے کی ہدایت بھی کی گئی۔
سی ای او ہیلتھ ڈاکٹر شاہد ریاض نے اجلاس کو بریفنگ دیتے ہوئے بتایا کہ مہم کے لئے 1797 ٹیمیں تشکیل دی گئی ہیں جبکہ ضلع کے 58 ٹرانزٹ پوائنٹس پر خصوصی فوکس کیا جائے گا۔
