لیہ میں سادہ لوح شہریوں کو لوٹنے کے نئے اور خطرناک طریقے تیزی سے پھیلنے لگے ہیں۔
بیرون ملک بھجوانے، گھر بیٹھے سرکاری دستاویزات حاصل کرنے، راتوں رات امیر ہونے اور آسان طریقے سے رقم کمانے جیسے لالچ دے کر دھوکہ دہی کرنے والے گروہ سرگرم ہیں۔
یہ گروہ واٹس ایپ، فیس بک، ٹویٹر، انسٹاگرام سمیت دیگر سوشل میڈیا پلیٹ فارمز کا سہارا لے کر معصوم لوگوں کو اپنے جال میں پھنسا رہے ہیں۔ متاثرہ افراد سے بھاری رقوم ہتھیانے کے بعد یہ فراڈیے موبائل نمبرز بند کر کے اور سوشل میڈیا اکاؤنٹس ڈی ایکٹیویٹ کر کے غائب ہو جاتے ہیں۔
شہریوں کا کہنا ہے کہ روزانہ کی بنیاد پر درجنوں مرد و خواتین مختلف مصنوعات کی خرید و فروخت کے بہانے بھی لٹ رہے ہیں۔ کوئی پرسانِ حال نہ ہونے کے باعث فراڈیوں کے حوصلے مزید بڑھتے جا رہے ہیں۔
اعداد و شمار کے مطابق گزشتہ دو سالوں میں دھوکہ دہی، فراڈ اور امانت میں خیانت کے مقدمات میں بے پناہ اضافہ ہوا ہے۔ متاثرین نے ایف آئی اے، نیشنل سائبر کرائم انویسٹی گیشن ایجنسی (NCCIA)، پنجاب پولیس اور دیگر متعلقہ اداروں سے فوری نوٹس لینے اور سخت کارروائی کا مطالبہ کیا ہے تاکہ شہریوں کو اس مکروہ دھندے سے بچایا جا سکے۔
