قطر کی وزارت خارجہ نے کہا ہے کہ اسرائیلی وزیراعظم نیتن یاہو نے دوحہ پر فضائی حملے پر معافی مانگی اور آئندہ قطر کی خودمختاری کو نشانہ نہ بنانے کا وعدہ کیا ہے۔
قطر کی وزارت خارجہ کے ترجمان کے مطابق نیتن یاہو نے امریکی صدر سے ملاقات کے دوران قطری وزیراعظم کو فون کرکے معافی مانگی۔ ترجمان نے کہا کہ اسرائیلی وزیراعظم نے یقین دہانی کرائی کہ قطر کی خودمختاری کا دوبارہ نقصان نہیں ہوگا، جبکہ امریکی صدر نے بھی اس وعدے کی ضمانت دی۔
بیان میں مزید کہا گیا کہ قطر نے اسرائیل کی یقین دہانی کو سراہتے ہوئے واضح کیا کہ کسی بھی خودمختاری کی خلاف ورزی کو ناقابلِ قبول سمجھا جائے گا۔ وزارتِ خارجہ کے مطابق شہریوں اور رہائشیوں کا تحفظ قطر کی اولین ترجیح ہے اور بحرانوں کا حل صرف سفارتی ذرائع سے ممکن ہے۔
واضح رہے کہ 9 ستمبر کو اسرائیل نے دوحہ میں فلسطینی مزاحمتی تنظیم حماس کے دفتر پر فضائی حملہ کیا تھا جس میں حماس رہنما خلیل الحیہ کے بیٹے سمیت 5 افراد اور ایک قطری سکیورٹی اہلکار شہید ہوئے تھے۔ حماس کے مطابق یہ حملہ مرکزی قیادت کو نشانہ بنانے کی کوشش تھی تاہم تمام رہنما محفوظ رہے۔
