منیلا : فلپائن کے وسطی ساحلی علاقے میں 6.9 شدت کے طاقتور زلزلے نے بڑے پیمانے پر تباہی مچا دی ہے، مختلف حادثات میں کم از کم 31 افراد ہلاک اور درجنوں زخمی ہوگئے۔
غیر ملکی میڈیا رپورٹس کے مطابق امریکی جیولوجیکل سروے نے بتایا کہ زلزلہ رات مقامی وقت کے مطابق 10 بجے آیا، جس کی گہرائی 10 کلومیٹر ریکارڈ کی گئی جبکہ اس کا مرکز سیبو کے قریب بوگو شہر کے شمال مشرق میں 17 کلومیٹر کے فاصلے پر تھا۔ زلزلے کے بعد متعدد آفٹر شاکس بھی محسوس کیے گئے جس سے لوگ خوفزدہ ہو کر گھروں سے باہر نکل آئے۔
رپورٹس میں کہا گیا ہے کہ زلزلے کے نتیجے میں عمارتیں زمین بوس ہوگئیں، ایک اسپورٹس کمپلیکس دورانِ میچ زمین پر گرنے سے کئی افراد ملبے تلے دب گئے۔ متاثرہ علاقوں میں گرجا گھروں، پلوں اور سڑکوں کو بھی شدید نقصان پہنچا ہے۔ سیبو میں ہنگامی حالت نافذ کرتے ہوئے آج تمام اسکولز اور سرکاری دفاتر بند رکھنے کا اعلان کیا گیا ہے۔
امدادی حکام کے مطابق ملبے تلے دبے افراد کو نکالنے کے لیے بڑے پیمانے پر ریسکیو آپریشن جاری ہے اور بھاری مشینری دیگر علاقوں سے منگوا لی گئی ہے۔ ڈیزاسٹر منیجمنٹ کے اہلکار نے تصدیق کی ہے کہ زلزلے کے باعث بجلی اور مواصلاتی نظام متاثر ہوا ہے، جس سے امدادی کارروائیوں میں مشکلات پیش آرہی ہیں۔
حکام کے مطابق متاثرہ علاقوں میں پانی، خوراک اور ادویات سمیت ضروری سامان فوری طور پر روانہ کرنے کی ہدایت کر دی گئی ہے، جبکہ خدشہ ظاہر کیا جا رہا ہے کہ ہلاکتوں کی تعداد میں مزید اضافہ ہو سکتا ہے۔
