خضدار/سکیورٹی فورسز نے بلوچستان کے ضلع خضدار میں دہشتگرد تنظیم فتنہ الہندوستان کے خلاف بڑا آپریشن کیا ہے، جس کے نتیجے میں 7 دہشتگرد ہلاک جبکہ 10 کے زخمی ہونے کی اطلاعات ہیں۔
سکیورٹی ذرائع کے مطابق کارروائی خفیہ معلومات کی بنیاد پر کی گئی۔ فورسز نے دہشتگردوں کے ٹھکانے کا محاصرہ کیا تو فائرنگ کا شدید تبادلہ ہوا، جس میں سات دہشتگرد مارے گئے۔ اس دوران کئی دہشتگرد زخمی بھی ہوئے جن کی تلاش جاری ہے۔
ذرائع کا کہنا ہے کہ ہلاک دہشتگردوں کے قبضے سے بھاری مقدار میں اسلحہ اور دھماکہ خیز مواد برآمد ہوا، جس میں آئی ای ڈیز، ٹرانسمیٹرز اور امریکی ساختہ خودکار ہتھیار شامل ہیں۔ سکیورٹی اہلکاروں نے علاقے میں موجود ایک بڑا خطرہ بھی ناکام بنایا اور فتنہ الہندوستان کی بدوکشت کے مرکزی پل پر نصب آئی ای ڈی کو بروقت ناکارہ بنا دیا۔
یاد رہے کہ اس سے قبل ڈیرہ اسماعیل خان میں سکیورٹی فورسز نے فتنہ الخوارج کے خلاف کارروائی کرتے ہوئے 13 دہشتگردوں کو ہلاک کیا تھا۔ سکیورٹی اداروں کے مطابق یہ سلسلہ ملک بھر میں دہشتگردی کے نیٹ ورکس کو توڑنے کے لیے جاری آپریشن کا حصہ ہے۔
سکیورٹی حکام نے بتایا کہ علاقے کو کلیئر کر دیا گیا ہے اور مزید کارروائیوں کے لیے سرچ آپریشن جاری ہے۔ عوام سے کہا گیا ہے کہ کسی بھی مشکوک سرگرمی یا شخص کی اطلاع فوراً قریبی سکیورٹی ادارے یا پولیس کو دیں تاکہ دہشتگردی کے مکمل خاتمے کو یقینی بنایا جا سکے۔
