نیویارک: اقوام متحدہ جنرل اسمبلی کے تحت اعلیٰ سطحی کانفرنس میں پاکستان نے عالمی برادری سے مطالبہ کیا ہے کہ روہنگیا مسلمانوں کی محفوظ اور باوقار واپسی کے لیے فوری اقدامات کیے جائیں۔
اقوام متحدہ میں پاکستان کے مستقل مندوب عاصم افتخار نے کانفرنس سے خطاب میں کہا کہ روہنگیا مسلمان کئی دہائیوں سے بے دخلی اور بنیادی حقوق سے محرومی کا شکار ہیں۔
پاکستانی مندوب کے مطابق میانمار کی ریاست رخائن میں حالیہ پرتشدد کارروائیوں نے صورتحال کو مزید سنگین بنا دیا ہے، جس کے نتیجے میں ہزاروں افراد کو ایک بار پھر ہجرت پر مجبور ہونا پڑا۔
عاصم افتخار نے کہا کہ روہنگیا مسلمانوں کو طویل عرصے سے تعلیم، صحت اور روزگار جیسے بنیادی انسانی حقوق سے محروم رکھا جا رہا ہے اور ان پر ہونے والے مظالم عالمی ضمیر کے لیے چیلنج ہیں۔
پاکستانی مندوب نے عالمی برادری پر زور دیا کہ وہ یکجہتی کے اپنے دعوؤں کو عملی جامہ پہنائے اور اس بات کو یقینی بنائے کہ روہنگیا مسلمان اپنے وطن واپس جا سکیں جہاں ان کے جان و مال اور بنیادی انسانی حقوق کا تحفظ ہو۔
