وفاقی وزیر مواصلات عبدالعلیم خان نے موٹر وے پولیس کے دو اہلکاروں کی دورانِ ڈیوٹی شہادت پر گہرے افسوس کا اظہار کرتے ہوئے متعلقہ حکام کو ہدایت دی ہے کہ غفلت کے مرتکب افراد کے خلاف سخت قانونی کارروائی عمل میں لائی جائے۔
ایم فائیو موٹر وے پر پیش آنے والے حادثے میں سب انسپکٹر ناصر شہید ہو گئے۔ وفاقی وزیر مواصلات نے اس افسوسناک واقعے پر شہید افسر کے اہلِ خانہ سے دلی ہمدردی اور تعزیت کا اظہار کیا۔ ان کا کہنا تھا کہ بے قابو گاڑی کی پٹرولنگ وین سے ٹکر کے نتیجے میں پولیس افسر کی شہادت نہایت رنجیدہ کر دینے والا سانحہ ہے۔
عبدالعلیم خان نے مری کے قریب پیش آنے والے دوسرے حادثے کا بھی ذکر کیا جس میں موٹر وے پولیس کے اہلکار وقار احمد ستی شہید ہو گئے۔ انہوں نے کہا کہ وقار احمد ستی کی شہادت پر دلی دکھ اور افسوس ہے، اور شہید اہلکار کے اہلِ خانہ کے غم میں برابر کے شریک ہیں۔
وفاقی وزیر نے متعلقہ حکام کو ہدایت دی کہ ان حادثات میں اگر کسی کی کوتاہی یا غفلت ثابت ہو تو اس کے خلاف فوری اور سخت کارروائی کی جائے تاکہ آئندہ ایسے سانحات سے بچا جا سکے اور ڈیوٹی پر مامور اہلکاروں کی جانوں کے تحفظ کو یقینی بنایا جا سکے۔
