فیفا نے فٹبال ورلڈکپ 2026 کے لیے آفیشل میچ بال TRIONDA (ٹریونڈا) متعارف کرا دی۔ یہ گیند جرمن کمپنی ایڈیڈاس نے ڈیزائن کی ہے جو جدید ترین ٹیکنالوجی اور تین میزبان ممالک امریکا، میکسیکو اور کینیڈا کی نمائندگی پر مبنی ہے۔
"ٹریونڈا” نام دو ہسپانوی الفاظ کو ملا کر بنایا گیا ہے: "Tri” (تین) اور "Onda” (لہر)۔ یہ نام تین میزبان ممالک اور گیند کے لہر نما ڈیزائن کو ظاہر کرتا ہے۔ بال پر سرخ، نیلا اور سبز رنگ نمایاں ہیں جبکہ ہر ملک کی علامت بھی شامل کی گئی ہے۔ کینیڈا کے لیے میپل کا پتا، میکسیکو کے لیے عقاب اور امریکا کے لیے ستارہ بال کے ڈیزائن کا حصہ ہیں۔ گیند پر موجود پیٹرن اتحاد کی علامت ہے۔
ورلڈکپ 2026 کی گیند میں پہلی بار جدید کنیکٹڈ بال ٹیکنالوجی نصب کی گئی ہے جس میں 500Hz موشن سینسر موجود ہے۔ یہ سینسر گیند کی ہر حرکت کا ڈیٹا فراہم کرے گا اور ریفریز کو آف سائیڈ، ہینڈ بال اور دیگر اہم فیصلے فوری اور درست کرنے میں مدد دے گا۔
رپورٹس کے مطابق TRIONDA کا ڈیزائن نہ صرف فٹبال کھیلنے والوں کے لیے بہترین کارکردگی فراہم کرے گا بلکہ یہ تینوں میزبان ممالک کی ثقافتی اور جغرافیائی نمائندگی بھی کرتا ہے۔
واضح رہے کہ فیفا ورلڈکپ 2026 آئندہ سال 11 جون سے 19 جولائی تک امریکا، میکسیکو اور کینیڈا میں منعقد ہوگا۔
