ممبئی: بھارتی کرکٹ بورڈ (بی سی سی آئی) نے اہم فیصلہ کرتے ہوئے روہت شرما کو ون ڈے کرکٹ ٹیم کی کپتانی سے ہٹا دیا ہے اور ان کی جگہ نوجوان بلے باز شبمن گل کو کپتان مقرر کر دیا گیا ہے۔
بی سی سی آئی کے مطابق شبمن گل نہ صرف ون ڈے ٹیم کی قیادت کریں گے بلکہ وہ ٹیسٹ ٹیم کے کپتان بھی ہوں گے۔ اس فیصلے کو بھارتی کرکٹ میں ایک بڑی تبدیلی قرار دیا جا رہا ہے کیونکہ روہت شرما گزشتہ کئی برسوں سے ون ڈے ٹیم کی قیادت کر رہے تھے اور ان کی کپتانی میں بھارت نے کئی اہم فتوحات حاصل کیں۔
بھارتی بورڈ نے آسٹریلیا کے خلاف ون ڈے سیریز کے لیے اسکواڈ کا اعلان بھی کر دیا ہے جس میں تجربہ کار کھلاڑی ویرات کوہلی اور سابق کپتان روہت شرما کو شامل کیا گیا ہے۔ تاہم اس بار وہ بطور کھلاڑی ہی ٹیم کا حصہ ہوں گے۔
ماہرین کے مطابق شبمن گل کو کپتان بنانے کا مقصد ٹیم میں نوجوان قیادت کو آگے لانا ہے تاکہ مستقبل کے بڑے ٹورنامنٹس میں بھارت ایک متوازن اور جاندار ٹیم کے ساتھ میدان میں اتر سکے۔
