کولمبو: آئی سی سی ویمنز ورلڈکپ میں پاکستان کی خواتین کرکٹ ٹیم آج دفاعی چیمپئن آسٹریلیا کے خلاف اپنا تیسرا میچ کھیلنے جا رہی ہے، جو گرین شرٹس کے لیے ٹورنامنٹ کا سب سے بڑا امتحان قرار دیا جا رہا ہے۔ ٹیم پاکستان اب تک اپنی پہلی کامیابی کی تلاش میں ہے، جبکہ آسٹریلوی ٹیم مسلسل فتوحات کے ساتھ مضبوط فارم میں موجود ہے۔
کولمبو کے میدان اور موسمی حالات سے واقفیت پاکستانی ٹیم کے لیے ایک فائدہ مند پہلو ہو سکتی ہے۔ کوچنگ اسٹاف کے مطابق، گزشتہ روز کے طویل پریکٹس سیشن میں بلے بازوں نے شارٹ سلیکشن اور پاور ہٹنگ پر خصوصی توجہ دی، جبکہ بولرز نے لائن اینڈ لینتھ میں تسلسل پیدا کرنے کی کوشش کی۔
ٹیم ذرائع کا کہنا ہے کہ کپتان ندا ڈار آج جارحانہ حکمتِ عملی کے ساتھ میدان میں اترنے کا ارادہ رکھتی ہیں تاکہ ابتدائی وکٹیں حاصل کر کے حریف ٹیم پر دباؤ ڈالا جا سکے۔ اسپنرز کے لیے کولمبو کی پچ سازگار سمجھی جا رہی ہے، جو میچ کے نتیجے میں اہم کردار ادا کر سکتی ہے۔
دوسری جانب آسٹریلوی کپتان ایلیسا ہیلی نے پری میچ کانفرنس میں کہا کہ ان کی ٹیم ہر میچ کو فائنل کی طرح کھیل رہی ہے اور وہ پاکستان کو کمزور حریف نہیں سمجھتیں۔ ان کے مطابق پاکستانی کھلاڑیوں میں ٹیلنٹ موجود ہے، تاہم آسٹریلوی ٹیم اپنے منصوبے پر فوکس رکھے گی۔
ٹورنامنٹ میں پاکستان کا یہ تیسرا میچ ہے، اس سے قبل گرین شرٹس کو بھارت اور جنوبی افریقہ کے خلاف شکست کا سامنا کرنا پڑا تھا۔ اگر آج کی بازی پاکستان کے حق میں رہی تو ٹیم کے سیمی فائنل تک رسائی کی امیدیں بحال ہو سکتی ہیں۔کرکٹ شائقین کے مطابق، آج کا میچ پاکستان ویمن ٹیم کے لیے “کرو یا مرو” کی حیثیت رکھتا ہے، اور پوری قوم کھلاڑیوں سے بہتر کھیل کی توقع کر رہی ہے۔
