بھارتی ویمن کرکٹر سمریتی مندھانا نے ون ڈے کرکٹ میں 28 سال پرانا عالمی ریکارڈ توڑ کر نئی تاریخ رقم کر دی ہے۔
جمعرات کو آئی سی سی ویمنز ورلڈ کپ 2025 کے دوران جنوبی افریقا کے خلاف میچ میں سمریتی مندھانا نے ایک کلینڈر ائیر میں سب سے زیادہ رنز بنانے کا ریکارڈ اپنے نام کیا۔ انہوں نے میچ کے آٹھویں اوور میں چھکا لگا کر یہ سنگ میل عبور کیا۔ جنوبی افریقا کے خلاف اس میچ میں انہوں نے 32 گیندوں پر 23 رنز بنائے۔
سمریتی مندھانا نے سال 2025 میں اب تک 18 ون ڈے میچز میں 4 سنچریوں کی مدد سے مجموعی طور پر 982 رنز بنا لیے ہیں، جس کے ساتھ انہوں نے آسٹریلیا کی سابق کرکٹر بلینڈا کلارک کا 28 سال پرانا ریکارڈ توڑ دیا۔ بلینڈا کلارک نے 1997 میں ایک کلینڈر ائیر میں 970 رنز بنائے تھے۔
اس شاندار کارکردگی کے ساتھ سمریتی مندھانا ویمنز ون ڈے کرکٹ کی تاریخ میں پہلی خاتون بیٹر بننے کے قریب ہیں جو ایک ہی سال میں 1000 رنز کا سنگ میل عبور کرے گی۔
