کراچی کے علاقے ضلعِ وسطی کی متعدد سڑکیں تباہ حالی کا شکار ہیں۔
جہانگیر روڈ سے تین ہٹی جانے اور آنے والی سڑکیں بری طرح خستہ حال ہو چکی ہیں۔ دونوں اطراف بڑے بڑے گڑھے پڑنے سے ٹریفک کی روانی شدید متاثر ہے، جبکہ تاحال سڑکوں کی تعمیر و مرمت کا کام شروع نہیں کیا جا سکا۔
سڑکوں کی بگڑتی ہوئی حالت کے باعث متعدد ڈرائیورز رانگ وے کا استعمال کر رہے ہیں، جس سے حادثات کے خدشات بڑھ گئے ہیں۔ دوسری جانب، ٹریفک کو درست سمت میں چلانے کے لیے ٹریفک پولیس اہلکار بھی موقع پر موجود نہیں۔
جہانگیر روڈ کی مرمت یا دوبارہ تعمیر گزشتہ ایک دہائی کے دوران چار سے زائد مرتبہ کی جا چکی ہے، تاہم ناقص منصوبہ بندی اور غیر معیاری کام کے باعث سڑکیں دوبارہ خراب ہو گئی ہیں۔ دھول مٹی کے باعث شہریوں کو سانس اور دیگر صحت کے مسائل کا سامنا ہے۔
اس کے علاوہ، جہانگیر روڈ کے مختلف مقامات پر کچرے کے ڈھیر جمع ہیں، جبکہ نشے کے عادی افراد کے ڈیرے بھی موجود ہیں، جس سے علاقے کی مجموعی حالت اور بھی خراب دکھائی دیتی ہے۔
