پاکستانی کوہ پیما اسد علی میمن نے ساتوں براعظموں کی بلند ترین چوٹیاں سر کرنے کا سفر مکمل کر کے تاریخی کارنامہ سر انجام دے دیا۔
اسد علی میمن نے "سیون سمٹ” کا یہ عظیم کارنامہ انڈونیشیا میں اوشیانا کی بلند ترین چوٹی پونچک جایا کو سر کر کے مکمل کیا۔ اس کامیابی کے ساتھ ہی وہ پاکستان کے ان چند کوہ پیماؤں میں شامل ہو گئے ہیں جنہوں نے دنیا کے ہر براعظم کی سب سے اونچی چوٹی سر کی۔
اسد علی میمن نے اپنے اس مہم جو سفر کا آغاز 2019 میں کیا تھا، جب انہوں نے یورپ کی بلند ترین چوٹی ماؤنٹ البرس کو سر کیا۔ اس کے بعد 2020 میں انہوں نے جنوبی امریکا کی اکونکاگوا کو تسخیر کیا۔
سال 2021 میں اسد میمن نے افریقا کی مشہور چوٹی کیلیمنجرو کو سر کیا جبکہ 2022 میں شمالی امریکا کی بلند ترین چوٹی ماؤنٹ دینالی کو فتح کیا۔
مزید برآں، 2023 میں انہوں نے دنیا کی بلند ترین چوٹی ماؤنٹ ایورسٹ پر پاکستان کا سبز ہلالی پرچم لہرا کر نئی تاریخ رقم کی۔ اسی سال کے آغاز میں انہوں نے انٹارکٹیکا کی بلند ترین چوٹی ماؤنٹ ونسن کو بھی سر کیا تھا۔
اوشیانا کی چوٹی پونچک جایا کی فتح کے ساتھ ہی اسد علی میمن نے اپنے سیون سمٹ مشن کو کامیابی سے مکمل کیا، جو عزم، حوصلے اور پاکستانی کوہ پیماؤں کی عالمی سطح پر شناخت کا مظہر ہے۔
