پشاور: صوبائی دارالحکومت پشاور میں رنگ روڈ پر فائرنگ کے ایک افسوسناک واقعے میں معروف اسٹیج اداکارہ و ڈانسر منیبہ شاہ کو گولیاں مار کر قتل کر دیا گیا۔ پولیس کے مطابق یہ واقعہ تھانہ مچنی گیٹ کی حدود میں پیش آیا، جہاں نامعلوم ملزمان نے ایک رکشے پر اندھا دھند فائرنگ کی۔
واقعے کے دوران رکشے میں سوار منیبہ شاہ موقع پر ہی جاں بحق ہوگئیں، جبکہ رکشہ ڈرائیور شدید زخمی ہوا، جسے فوری طور پر قریبی اسپتال منتقل کر دیا گیا۔ پولیس کے مطابق فائرنگ کے بعد ملزمان جائے وقوعہ سے فرار ہونے میں کامیاب ہوگئے۔
پولیس حکام نے بتایا کہ جائے وقوعہ سے شواہد اکٹھے کر لیے گئے ہیں اور ابتدائی تفتیش شروع کر دی گئی ہے۔ واقعے کی وجوہات اور ملزمان کی شناخت کے لیے مختلف پہلوؤں سے تحقیقات کی جا رہی ہیں۔ حکام کا کہنا ہے کہ واقعے کے پیچھے ممکنہ دشمنی یا ذاتی تنازع کے امکانات کو بھی خارج از امکان قرار نہیں دیا جا سکتا۔
پولیس نے مقتولہ کے اہل خانہ سے بھی رابطہ کیا ہے تاکہ مقدمے کے اندراج اور تفتیش میں مدد حاصل کی جا سکے۔ دوسری جانب فنکار برادری نے منیبہ شاہ کے قتل کی شدید مذمت کرتے ہوئے حکومت سے واقعے میں ملوث ملزمان کی فوری گرفتاری کا مطالبہ کیا ہے۔
