وزیراعلیٰ پنجاب مریم نواز کی افغان جارحیت کی مذمت، پاک فوج کو خراج تحسین پیش

لاہور: وزیراعلیٰ پنجاب مریم نواز شریف نے افغانستان کی جانب سے پاکستانی علاقوں پر بلااشتعال جارحیت کی سخت مذمت کرتے ہوئے کہا ہے کہ پاک فوج نے دشمن کے اشتعال کا دلیری، عزم اور دانشمندی کے ساتھ جواب دے کر قوم کا سر فخر سے بلند کر دیا۔

اپنے بیان میں مریم نواز نے کہا کہ پاک فوج پوری قوم کی عزت، غیرت اور وقار کی محافظ ہے۔ افغان جارحیت کا جواب ایک واضح پیغام ہے کہ پاکستان امن چاہتا ہے لیکن اپنی سالمیت اور خودمختاری پر کوئی سمجھوتہ نہیں کرے گا۔ انہوں نے کہا کہ دشمن کی ہر جارحیت کا جواب ہمیشہ کی طرح جرات اور قومی اتحاد کے ساتھ دیا جائے گا۔

وزیراعلیٰ پنجاب کا کہنا تھا کہ پاکستان کی سرحدیں مقدس امانت ہیں اور ان کی حفاظت ہر شہری کی ذمہ داری ہے۔ پنجاب کے 12 کروڑ عوام اپنی بہادر افواج کے ساتھ کندھے سے کندھا ملا کر کھڑے ہیں۔

مریم نواز نے مزید کہا کہ "ہم امن کے خواہاں ہیں، لیکن امن کی خواہش کو کمزوری نہ سمجھا جائے۔ پاک فوج کا جواب اس بات کا ثبوت ہے کہ پاکستان اپنی سرزمین کے دفاع میں کسی بھی حد تک جا سکتا ہے۔”