کراچی: سینٹرل جیل سے رہائی پانے والے شخص کو چند ہی لمحوں بعد قتل کر دیا گیا، واقعے نے پولیس اور شہریوں کو حیران کر دیا۔
تفصیلات کے مطابق مقتول کی شناخت امیر بخش کے نام سے ہوئی، جو سینٹرل جیل کراچی سے رہائی کے بعد باہر نکلا ہی تھا کہ جیل کے قریب ہی نامعلوم افراد نے اس پر فائرنگ اور چھریوں سے حملہ کر دیا۔ شدید زخمی حالت میں امیر بخش موقع پر ہی دم توڑ گیا۔
پولیس کے مطابق مقتول کا آبائی تعلق لاڑکانہ سے تھا اور اس نے پسند کی شادی کر رکھی تھی۔ پولیس کو شبہ ہے کہ اسی رنجش کی بنا پر مخالفین اس کی رہائی کے بعد گھات لگائے بیٹھے تھے۔ جیسے ہی امیر بخش جیل سے باہر نکلا، چند قدم کے فاصلے پر حملہ آوروں نے اس پر چھریوں کے پے در پے وار کیے جس سے وہ موقع پر جاں بحق ہو گیا۔
پولیس کا کہنا ہے کہ واقعے کی تحقیقات شروع کر دی گئی ہیں، ملزمان کی تلاش کے لیے قریبی سی سی ٹی وی فوٹیجز حاصل کی جا رہی ہیں تاکہ ان کی شناخت ممکن ہو سکے۔
دوسری جانب کراچی کے علاقے گڈاپ میں ایک بنگلے سے نوجوان کی پھندا لگی لاش برآمد ہوئی ہے۔ پولیس کے مطابق متوفی کی فوری شناخت نہیں ہو سکی، جبکہ لاش کو پوسٹ مارٹم کے لیے اسپتال منتقل کر دیا گیا ہے۔
تحقیقاتی افسران کے مطابق یہ کہنا قبل از وقت ہوگا کہ واقعہ قتل ہے یا خودکشی، تاہم شواہد اکٹھے کیے جا رہے ہیں اور فرانزک رپورٹ کے بعد حتمی نتیجہ سامنے آئے گا۔
پولیس نے دونوں واقعات کو سنگین نوعیت کے قرار دیتے ہوئے کہا ہے کہ حقائق سامنے آنے پر مزید قانونی کارروائی کی جائے گی۔
