لاہور: پنجاب حکومت نے صوبے میں مقیم افغان شہریوں کو ٹیکس نیٹ میں شامل کرنے کا فیصلہ کر لیا ہے۔
وزیراعلیٰ پنجاب مریم نواز کی زیر صدارت امن و امان سے متعلق اہم اجلاس منعقد ہوا، جس میں افغان شہریوں کو ٹیکس کے دائرے میں لانے اور غیر قانونی افغان باشندوں کا ریئل ٹائم ڈیٹا تیار کرنے کا فیصلہ کیا گیا۔
پنجاب حکومت کے جاری کردہ اعلامیے میں کہا گیا ہے کہ غیر قانونی تارکین وطن کے لیے "وسل بلوئر سسٹم” متعارف کرایا جائے گا، جس کے تحت اطلاع فراہم کرنے والے شخص کا نام مکمل طور پر خفیہ رکھا جائے گا۔
مزید برآں، حکومتِ پنجاب نے غیر قانونی رہائش پذیر غیر ملکیوں اور ان کے کاروباروں کے خلاف کومبنگ آپریشن شروع کرنے کا فیصلہ بھی کیا ہے، جب کہ غیر قانونی غیر ملکی باشندوں کو وفاقی حکومت کی پالیسی کے مطابق فوری طور پر ڈی پورٹ کیا جائے گا۔
