اسلام آباد: صدر مملکت آصف علی زرداری سے فیلڈ مارشل عاصم منیر نے ملاقات کی، جس میں ملکی اور خارجی سلامتی کی مجموعی صورتحال پر تفصیلی تبادلہ خیال کیا گیا۔
ذرائع کے مطابق فیلڈ مارشل عاصم منیر نے صدر مملکت کو ملک میں داخلی و خارجی سیکیورٹی کی تازہ ترین صورتحال سے آگاہ کیا، جبکہ افغان طالبان کی جانب سے بڑھتی ہوئی اشتعال انگیزیوں اور سرحدی خلاف ورزیوں کے حوالے سے تفصیلی بریفنگ دی۔
ملاقات میں افغان طالبان حکومت کی جارحانہ سرگرمیوں، پاک فوج کی محتاط اور مؤثر جوابی کارروائیوں، اور خطے میں امن و استحکام برقرار رکھنے کے لیے جاری کوششوں پر بھی غور کیا گیا۔
صدر آصف علی زرداری نے اس موقع پر پاک فوج کی بہادری، پیشہ ورانہ مہارت اور دفاعِ وطن کے جذبے کو سراہتے ہوئے کہا کہ قوم کو اپنی مسلح افواج پر مکمل اعتماد ہے۔
