اسلام آباد: وزیراعظم شہباز شریف نے وفاقی کابینہ کا اہم اجلاس کل طلب کر لیا ہے، جس میں ملک کی موجودہ سیاسی اور معاشی صورتحال کا تفصیلی جائزہ لیا جائے گا۔
ذرائع کے مطابق اجلاس میں افغان طالبان، فتنہ الہندوستان اور فتنہ الخوارج کی جانب سے جاری اشتعال انگیزیوں پر بھی غور کیا جائے گا۔ سیکیورٹی ادارے کابینہ کو تازہ ترین بریفنگ دیں گے، جبکہ داخلی امن و استحکام کے لیے مجوزہ اقدامات پر مشاورت ہوگی۔
ذرائع کا کہنا ہے کہ وزیراعظم اپنے حالیہ دورۂ مصر اور غزہ امن سربراہی اجلاس میں پاکستان کے کردار سے متعلق کابینہ کو آگاہ کریں گے۔ اجلاس میں غزہ امن کانفرنس میں پاکستان کی مؤثر شرکت کو خصوصی طور پر اجاگر کیا جائے گا۔
اس کے علاوہ قانون سازی سے متعلق کابینہ کمیٹی کے فیصلے بھی منظوری کے لیے پیش کیے جائیں گے۔
دوسری جانب وزیراعظم شہباز شریف اور صدر آصف علی زرداری کی آج ایوانِ صدر میں اہم ملاقات متوقع ہے، جس میں ملک کی مجموعی سیاسی صورتحال، آزاد جموں و کشمیر کے حالات اور پیپلز پارٹی کے تحفظات و مطالبات پر تبادلہ خیال کیا جائے گا۔
