اسلام آباد: فیڈرل پبلک سروس کمیشن (ایف پی ایس سی) نے سی ایس ایس 2025 کے نتائج جاری کر دیے۔ تحریری امتحان میں شریک 15 ہزار 602 امیدواروں میں سے صرف 397 امیدوار کامیاب قرار پائے۔
ایف پی ایس سی کے مطابق تحریری امتحان میں پنجاب سے سب سے زیادہ 269 امیدوار کامیاب ہوئے، جب کہ سندھ رورل سے 33، سندھ اربن سے 19 امیدواروں نے کامیابی حاصل کی۔
رپورٹ کے مطابق خیبرپختونخوا سے 31 اور بلوچستان سے 22 امیدوار کامیاب قرار پائے، گلگت بلتستان سے 2 امیدواروں نے کامیابی حاصل کی، جبکہ آزاد کشمیر سے کوئی بھی امیدوار کامیاب نہ ہو سکا۔
تحریری امتحان اور انٹرویو مکمل ہونے کے بعد مجموعی طور پر 229 امیدواروں کو کامیاب قرار دیا گیا۔
ایف پی ایس سی کے مطابق پہلے 20 پوزیشن ہولڈرز میں سے 19 امیدواروں نے پاکستان ایڈمنسٹریٹو سروس (PAS) اور ایک امیدوار نے پولیس سروس آف پاکستان (PSP) گروپ منتخب کیا۔
ذرائع کے مطابق کامیاب امیدواروں کو ان کی تعیناتی سے قبل ایک جامع تربیتی پروگرام میں شرکت کرنا ہوگی، جس کے بعد انہیں مختلف وفاقی و صوبائی محکموں میں تعینات کیا جائے گا۔
امتحانات کے نتائج ایف پی ایس سی کی ویب سائٹ پر بھی جاری کر دیے گئے ہیں۔
