گھوٹکی: سندھ کے شہر ڈھرکی سے تیل اور گیس کے نئے ذخائر دریافت کرلیے گئے۔
ماڑی انرجیز لمیٹڈ نے اعلامیہ جاری کرتے ہوئے بتایا ہے کہ کمپنی نے ضلع گھوٹکی کے علاقے ڈھرکی میں ماڑی غزیج سی ایف بی ون نامی ایکسپلوریشن کنویں سے تیل اور گیس کا نیا ذخیرہ دریافت کیا ہے۔ ادارے کے مطابق ماڑی انرجیز اس منصوبے کی 100 فیصد آپریٹر اور ماڑی ڈیولپمنٹ اینڈ پروڈکشن لیز کی مکمل مالک ہے۔
اعلامیے میں کہا گیا کہ ایف بی ون ایکسپلوریشن کنواں تیل سے بھرپور زونز کو ہدف بنا کر کھودا گیا تھا۔ ٹیسٹنگ کے دوران کنویں سے 305 بیرل یومیہ تیل اور 30 لاکھ مکعب فٹ یومیہ گیس حاصل ہوئی، جو ملکی توانائی شعبے کے لیے ایک مثبت پیش رفت ہے۔
ماڑی انرجیز کے مطابق کمپنی اس وقت ڈھرکی ماڑی فیلڈ میں پاکستان کے سب سے بڑے قدرتی گیس کے ذخیرے کو چلارہی ہے۔ ادارے کا کہنا ہے کہ ماڑی انرجیز تقریباً 30 فیصد مارکیٹ شیئر کے ساتھ ملک کی گیس پیدا کرنے والی سب سے بڑی کمپنی ہے، جو ملکی معیشت کے استحکام اور توانائی کے شعبے کی ترقی میں نمایاں کردار ادا کر رہی ہے۔
