اسلام آباد: پاکستان پیپلزپارٹی اور مسلم لیگ (ن) کے درمیان سیاسی رابطوں کا نیا دور آج ایک اہم ملاقات کی صورت میں ہونے جا رہا ہے۔ ذرائع کے مطابق پیپلزپارٹی کا اعلیٰ سطحی وفد آج نائب وزیراعظم اسحاق ڈار سے دفتر خارجہ میں ملاقات کرے گا۔ وفد میں سابق وزیراعظم راجہ پرویز اشرف، وفاقی وزیر شیری رحمان، نیئر بخاری اور ندیم افضل چن شامل ہوں گے۔
اس ملاقات میں ملکی سیاسی صورتحال، پارلیمانی حکمتِ عملی، اتحادی حکومت کے مستقبل کے اقدامات اور آئندہ کے لائحہ عمل پر تفصیلی مشاورت متوقع ہے۔ ذرائع کے مطابق دونوں جماعتیں پارلیمنٹ کے اندر تعاون بڑھانے اور اہم قانون سازی پر متفقہ حکمتِ عملی بنانے پر غور کریں گی۔
سیاسی مبصرین کے مطابق یہ ملاقات حکومت اور اتحادی جماعتوں کے درمیان تعلقات کو مزید مستحکم کرنے میں مددگار ثابت ہو سکتی ہے۔ ذرائع کا کہنا ہے کہ اسحاق ڈار اور پیپلزپارٹی قیادت کے درمیان بات چیت میں حالیہ سیاسی چیلنجز، بجٹ حکمتِ عملی اور صوبوں میں پارٹی ورکنگ ریلیشنز کے معاملات بھی زیرِ بحث آئیں گے۔
تجزیہ کاروں کے مطابق یہ رابطے مستقبل میں پیپلزپارٹی اور مسلم لیگ (ن) کے درمیان سیاسی ہم آہنگی اور مشترکہ حکمتِ عملی کے فروغ کے لیے ایک اہم سنگ میل ثابت ہو سکتے ہیں۔
