راولپنڈی: انسداد دہشت گردی کی خصوصی عدالت نے 26 نومبر کے احتجاج کیس میں پاکستان تحریک انصاف (پی ٹی آئی) کے بانی چیئرمین عمران خان کی بہن علیمہ خان کے ناقابلِ ضمانت وارنٹ گرفتاری جاری کر دیے۔
عدالت نے ملزمہ کے ضامن کو بھی نوٹس جاری کرتے ہوئے ہدایت کی ہے کہ علیمہ خان کو آئندہ سماعت پر عدالت میں پیش کیا جائے۔کیس کی سماعت خصوصی عدالت کے جج امجد علی شاہ نے کی۔ دورانِ سماعت علیمہ خان اور ان کے وکیل عدالت میں پیش نہ ہوئے اور نہ ہی حاضری سے استثنیٰ کی کوئی درخواست جمع کرائی گئی۔
پراسیکیوٹر ظہیر شاہ نے عدالت کو بتایا کہ علیمہ خان جان بوجھ کر پیش نہیں ہو رہیں اور وہ عدالتی کارروائی میں رکاوٹ بن رہی ہیں۔ انہوں نے مؤقف اختیار کیا کہ ملزمہ کی غیر حاضری سے مقدمے کی کارروائی متاثر ہو رہی ہے، لہٰذا ان کے ناقابلِ ضمانت وارنٹ گرفتاری جاری کیے جائیں اور ان کے ضامن کو شوکاز نوٹس جاری کیا جائے۔
عدالت نے فریقین کے دلائل سننے کے بعد پراسیکیوٹر کی استدعا منظور کرلی اور علیمہ خان کے ناقابلِ ضمانت وارنٹ گرفتاری جاری کرنے کا حکم دے دیا۔عدالت نے ان کے ضامن کو بھی نوٹس جاری کرتے ہوئے ہدایت کی کہ ملزمہ کو ہر صورت آئندہ سماعت پر عدالت میں پیش کیا جائے۔ کیس کی مزید سماعت 20 اکتوبر تک ملتوی کر دی گئی۔
