بالی وڈ کی معروف اداکارہ پرینیتی چوپڑا اور بھارتی سیاستدان راگھو چڈھا کے گھر خوشیوں کا نزول ہوا ہے، دونوں کے ہاں بیٹے کی پیدائش ہوئی ہے۔
گزشتہ روز سوشل میڈیا پر جاری ایک مشترکہ پوسٹ میں جوڑے نے شادی کے دو سال بعد اپنے پہلے بچے کی آمد کی خبر دی، جس پر مداحوں اور شوبز حلقوں کی جانب سے مبارکبادوں کا تانتا بندھ گیا۔
اداکارہ پرینیتی اور راگھو چڈھا نے اپنی پوسٹ میں جذباتی انداز اپناتے ہوئے لکھا کہ
بالآخر وہ آگیا، ہمارا بیٹا… اور ہمیں پہلے والی زندگی یاد نہیں۔ ہماری آغوش بھری ہوئی ہے اور ہمارے دل اس سے بھی زیادہ بھر گئے ہیں۔
جوڑے نے مزید لکھا، پہلے ہم ایک دوسرے کے لیے تھے، اور اب ہمارے پاس سب کچھ ہے۔
یہ خبر سامنے آتے ہی سوشل میڈیا پر پرینیتی اور راگھو کے مداحوں کی جانب سے مبارکبادوں کا سلسلہ شروع ہو گیا۔ بالی وڈ شخصیات، مداحوں اور سیاسی شخصیات نے جوڑے کے لیے نیک خواہشات کا اظہار کیا اور نومولود کے لیے صحت و خوشیوں کی دعائیں کیں۔
واضح رہے کہ پرینیتی چوپڑا اور راگھو چڈھا نے ستمبر 2023 میں راجستھان کے شہر ادے پور میں واقع ہوٹل لیلا پیلس اور ادایا ولاز میں شاندار شادی کی تھی۔
رواں سال اگست میں پرینیتی چوپڑا نے اپنے امید سے ہونے کی تصدیق کی تھی، جس کے بعد ان کے مداح اس خوشخبری کے شدت سے منتظر تھے۔
اداکارہ کے قریبی ذرائع کے مطابق ماں اور بچہ دونوں صحت مند ہیں، جبکہ خاندان نے اس خوشی کے موقع پر میڈیا اور عوام سے دعاؤں اور نیک تمناؤں کی درخواست کی ہے۔
