ایران نے ایک اور شخص کو اسرائیلی خفیہ ایجنسی موساد کے لیے جاسوسی کرنے کے الزام میں پھانسی دے دی۔
ایرانی خبر رساں ادارے میزان نیوز کے مطابق عدالتی حکام نے تصدیق کی ہے کہ پھانسی پانے والا شخص موساد کے ساتھ رابطے میں تھا اور ایران کی خفیہ معلومات اسرائیل کو فراہم کر رہا تھا۔
عرب میڈیا نے ایرانی پراسیکیوٹر کاظم موسوی کے حوالے سے بتایا کہ مجرم صیہونی حکومت کی خفیہ سروسز کے ساتھ مسلسل رابطے میں رہا اور اس نے موساد کے افسران سے متعدد ملاقاتیں بھی کیں۔
ایرانی حکام کا کہنا ہے کہ انٹیلی جنس اور دیگر سیکیورٹی اداروں کی بروقت اور مؤثر کارروائی کے نتیجے میں اس جاسوس کی شناخت ممکن ہوئی اور مزید حساس معلومات کو افشا ہونے سے بچا لیا گیا۔
یاد رہے کہ ایران نے ماضی میں بھی اسرائیل کے لیے جاسوسی کرنے والے متعدد افراد کو گرفتار کر کے سزائے موت دی ہے۔ گزشتہ ماہ بھی ایرانی عدالت نے ایک شخص کو موساد کے لیے کام کرنے کے جرم میں پھانسی کی سزا سنائی تھی۔
