لاہور: گورنر خیبر پختونخوا فیصل کریم کنڈی کا کہنا ہے کہ ملک و قوم کے دشمن دہشت گردوں کے خلاف انٹیلیجنس بنیادوں پر آپریشن ناگزیر ہے۔
وفاقی وزیر داخلہ محسن نقوی سے ملاقات کے دوران دونوں رہنماؤں نے خیبرپختونخوا میں امن و امان کی موجودہ صورتحال، حالیہ دہشت گردی کے واقعات اور صوبے کے مختلف اضلاع میں فتنۃ الخوارج کے خلاف جاری آپریشنز پر تفصیلی تبادلہ خیال کیا۔ ملاقات میں پاک افغان سرحدی صورتحال پر بھی بات ہوئی۔
دونوں رہنماؤں نے صوبے میں فتنۃ الہندوستان کے خلاف سکیورٹی فورسز کی کامیاب کارروائیوں کو سراہا اور پولیس ٹریننگ سینٹر و نادرا آفس ڈی آئی خان پر حملوں کے شہداء کو خراج عقیدت پیش کیا۔ ملاقات میں پولیس ٹریننگ سینٹر اور نادرا آفس کی متاثرہ عمارتوں کی ازسر نو بحالی کے معاملات پر بھی گفتگو ہوئی۔
وزیر داخلہ محسن نقوی نے کہا کہ خیبرپختونخوا کے عوام اور قانون نافذ کرنے والے اداروں نے بہادری سے دہشت گردی کے ناسور کا مقابلہ کیا ہے۔ ان کا کہنا تھا کہ فتنۃ الہندوستان پاکستان کی یکجہتی اور امن کے دشمن ہیں اور درندہ صفت عناصر کے خلاف آپریشنز جاری رہیں گے۔ وفاقی حکومت صوبے میں امن و امان اور انسداد دہشت گردی کیلئے بھرپور تعاون فراہم کر رہی ہے اور بھارتی حمایت یافتہ دہشت گردوں کے مذموم عزائم کامیاب نہیں ہوں گے۔
گورنر فیصل کریم کنڈی نے کہا کہ صوبے کے عوام امن کے داعی ہیں اور خیبرپختونخوا کی ترقی و خوشحالی کے لیے قیام امن ناگزیر ہے۔ انہوں نے کہا کہ ملک و قوم کے دشمن دہشت گردوں کے خلاف انٹیلیجنس بیسڈ آپریشنز ناگزیر ہیں۔
