اسلام آباد: صدر مملکت آصف علی زرداری نے دیوالی کے موقع پر پاکستان اور بیرونِ ملک مقیم ہندو برادری کو دلی مبارکباد دی ہے اور کہا ہے کہ دیوالی روشنی کے اندھیرے پر اور نیکی کے بدی پر غلبے کی علامت ہے۔ یہ تہوار امن، رواداری، ہمدردی اور ہم آہنگی جیسی آفاقی اقدار کی یاد دہانی کراتا ہے۔
ایوان صدر سے جاری بیان کے مطابق صدر مملکت نے کہا کہ آئینِ پاکستان تمام شہریوں کو مساوی حقوق اور مذہبی آزادی کی مکمل ضمانت دیتا ہے۔ انہوں نے زور دیا کہ ایسا معاشرہ قائم رکھا جائے جہاں تمام مذاہب کے ماننے والے عزت، وقار اور احترام کے ساتھ رہ سکیں۔
آصف علی زرداری نے کہا کہ قائداعظم محمد علی جناحؒ نے ایک ایسے پاکستان کا تصور پیش کیا تھا جہاں اقلیتوں کو مساوی حقوق اور مواقع حاصل ہوں۔ انہوں نے ہندو برادری کو پاکستان کے سماجی، ثقافتی اور معاشی ڈھانچے کا اہم حصہ قرار دیتے ہوئے تعلیم، تجارت اور عوامی خدمت کے شعبوں میں ان کی خدمات کو قابلِ تحسین قرار دیا۔
صدر مملکت نے کہا کہ دیوالی ہمیں رواداری، اتحاد اور پُرامن بقائے باہمی کے عزم کو تازہ کرنے کی ترغیب دیتی ہے اور پاکستان و بیرونِ ملک مقیم ہندو برادری کے لیے خوشی، امن اور خوشحالی کی دعا کی۔
