اسلام آباد: نیشنل الیکٹرک پاور ریگولیٹری اتھارٹی (نیپرا) نے کراچی کے صارفین کے لیے بڑی خوشخبری دیتے ہوئے کے الیکٹرک کے ٹیرف میں 7 روپے 60 پیسے فی یونٹ کمی کا حکم دے دیا ہے۔
تفصیلات کے مطابق نیپرا نے کے الیکٹرک کے مالی سال 2024 تا 2030 کے ملٹی ایئر ٹیرف کی نظرِ ثانی سے متعلق درخواستوں پر فیصلہ جاری کر دیا ہے۔ اس فیصلے کے تحت کے الیکٹرک کا اوسط ٹیرف 39 روپے 97 پیسے فی یونٹ سے کم کرکے 32 روپے 37 پیسے فی یونٹ مقرر کیا گیا ہے۔
نیپرا حکام کے مطابق رائٹ آف کلیمز سے متعلق نیپرا کا سابقہ فیصلہ برقرار رکھا گیا ہے، جب کہ یہ فیصلہ کے الیکٹرک کے جنریشن، ٹرانسمیشن، ڈسٹری بیوشن اور سپلائی کے تمام پہلوؤں کو کور کرتا ہے۔
فیصلے کے تحت اگرچہ فی یونٹ بجلی کی قیمت میں 7 روپے 60 پیسے کی نمایاں کمی کی گئی ہے، تاہم صارفین پر 50 ارب روپے کا بوجھ بدستور برقرار رکھا گیا ہے جو “رائٹ آف کلیمز” کی مد میں شامل ہے۔
دوسری جانب کے الیکٹرک کے ترجمان نے ردعمل دیتے ہوئے کہا ہے کہ کمپنی نیپرا کے فیصلے کا تفصیلی جائزہ لے رہی ہے۔ ترجمان کے مطابق یہ فیصلہ کے الیکٹرک کے مختلف کاروباری پہلوؤں — بشمول بجلی کی پیداوار، ترسیل اور تقسیم — پر اثر انداز ہوگا، اور کمپنی اس ضمن میں تمام قانونی راستے اختیار کرنے کا حق محفوظ رکھتی ہے۔
ترجمان نے مزید کہا کہ کے الیکٹرک اپنے صارفین کو قابلِ اعتماد بجلی کی فراہمی کے لیے پرعزم ہے، تاہم موجودہ فیصلے کے اثرات کا جائزہ لے کر آئندہ کے اقدامات کا تعین کیا جائے گا۔
